სიახლეები
  • სიახლეები

სიახლეები

სიახლეები
2026-04-16

პროგრესის გუნდი “Bees” საქართველოს Diamond Challenge-ის საერთაშორისო ფინალზე წარადგნეს.

Progress School Success

სკოლა პროგრესი არის სივრცე, სადაც მოსწავლეები ყოველდღე ქმნიან საკუთარ წარმატების ისტორიებს. სწორედ მათი მიღწევები აყალიბებს პროგრესს, როგორც ლიდერს საერთაშორისო თუ ადგილობრივ ასპარეზზე. ამ ფაქტს ადასტურებს ის, რომ მხოლოდ 2024-2025 წლებში პროგრესელებმა მოიპოვეს 55-ზე მეტი პირველი ადგილი საერთაშორისო პროექტებში და ეს მაჩვენებელი დღემდე მზარდია.

ბოლო დროს ერთ-ერთი პრესტიჟული საერთაშორისო კონკურსი, სადაც პროგრესელებმა მაღალი შედეგი აჩვენეს, იყო Diamond Challenge. კონკურსის რეგიონალურ ფინალში იასპარეზა პროგრესელების სამმა გუნდმა, რომელთაგანაც გუნდი "Bees" პირველი ადგილის მფლობელად დასახელდა.

Diamond Challenge არის მსოფლიოში ერთ-ერთი ყველაზე პრესტიჟული სამეწარმეო კონკურსი სკოლის მოსწავლეებისთვის, რომელიც შექმნილია Delaware-ის უნივერსიტეტის Horn Entrepreneurship პროგრამის ფარგლებში. 2012 წლიდან დღემდე კონკურსში მონაწილეობა მიიღო 126 ქვეყნიდან 16,000-ზე მეტმა მოზარდმა.

კონკურსის მონაწილეები ავითარებენ ბიზნეს ან სოციალური ინოვაციის იდეებს, რომლებსაც წარუდგენენ გამოცდილ მენტორებს. კონკურსი კულმინაციას აღწევს Limitless World Summit-ით, Delaware-ის უნივერსიტეტში გამართული რამდენიმედღიანი ღონისძიებით, სადაც მსოფლიოს სხვადასხვა ქვეყნიდან ჩამოსული ახალგაზრდა ინოვატორები ერთმანეთს შეეჯიბრებიან $100,000-იანი საპრიზო ფონდის მოსაპოვებლად.
პროგრესის გუნდმა რეგიონალურ ფინალში გამარჯვება მოიპოვა პროექტით - Bee Venom Extraction Process Management and Control System, რომელიც ფოკუსირებულია ფუტკრის შხამის მოპოვების პროცესის ეფექტიან მართვასა და კონტროლზე და აერთიანებს ინოვაციასა და სოციალურ პასუხისმგებლობას.

გამარჯვებული გუნდის წევრები:

  • • ლაზარე ჩაჩუა.
  • • ეთუნა ვეკუა.
  • • ლიზა აბაშიძე.
  • • კესო ფეიქრიშვილი.

ეს გამარჯვება ნიშნავს, რომ საქართველოს Diamond Challenge-ის საბოლოო ეტაპსა და საერთაშორისო ასპარეზზე სწორედ პროგრესის გუნდი წარადგენს. ისინი ამჟამად ემზადებიან კონკურსის ფინალური ეტაპისთვის - Limitless World Summit-ისთვის, რომელიც 2026 წლის 23-24 აპრილს დელავერის უნივერსიტეტში გაიმართება.

გავიგოთ, თუ როგორია გუნდის წევრების მოლოდინები ამ მნიშვნელოვანი შესაძლებლობის შესახებ:

“ამ პროექტში წარმატებას ველოდები, რადგან მასში დიდი შრომაა ჩადებული STEM კლუბის ფარგლებში, მენტორების ბატონი დავითის, უტას და მარეხის დახმარებით. ეს იდეა თავიდანვე ძალიან მნიშვნელოვანი და საინტერესო იყო ჩვენთვის, რამაც მოგვცა მოტივაცია, რომ მუდმივად გვემუშავა მის გაუმჯობესებაზე. ჩვენი გუნდი უკვე დიდი ხანია ერთად მუშაობს და ამავე შემადგენლობით არაერთი პროექტი გვაქვს განხორციელებული და წარდგენილი სხვადასხვა კონკურსზე, რაც კიდევ უფრო ამყარებს ჩვენს ურთიერთგაგებასა და გუნდურ მუშაობას. სწორედ ეს გამოცდილება, ერთიანობა და ერთმანეთის ნდობა გვაძლევს ძალას, რომ უკეთეს შედეგს მივაღწიოთ. მიუხედავად იმისა, რომ პირადად ვერ ვახერხებ Global Summit-ზე დასწრებას, მაინც სრულად ვარ ჩართული პროცესში ჩემს გუნდთან ერთად. მჯერა, რომ ჩვენი ერთობლივი შრომა, მონდომება და იდეის მიმართ რწმენა აუცილებლად გამოიღებს წარმატებულ შედეგს და ჩვენი ძალისხმევა დაფასდება.” - ლაზარე ჩაჩუა.
“ვფიქრობ რომ ეს კონკურსი ძალიან ბევრ, ახალ ადამიანს შემახვედრებს, რომლებთან თანამშრომლობით მომავალში შემეძლება უკეთესი პროექტების შექმნა და რეალობის დადებითად შეცვლა. მართალია გამარჯვება ყოველთვის ძალიან კარგი გრძნობაა, თუმცა ხშირად გამარჯვებაზე უკეთესი ასეთი გამოცდილების მიღება და ახალი ადამიანების შეძენაა. ეს პროექტი ნამდვილად არის უდიდესი წარმატება და ახალი თავგადასავალი ამერიკის შეერთებულ შტატებში თითოეული ჩვენგანისთვის!” - კესო ფეიქრიშვილი.
“ამ პროექტმა ძალიან ბევრი რამ მასწავლა. გამარჯვებასთან ერთად, რა თქმა უნდა, ველოდები იმ გამოცდილებასა და თავგადასავლებს, რომლებიც წინ მელოდება. ამასთანავე, გავიცნობ ძალიან ბევრ საინტერესო და მნიშვნელოვან ადამიანს და გავიფართოვებ სოციალურ წრეს.” - ეთუნა ვეკუა.
“ყველაზე მეტად ველი გამოცდილებას და საკუთარ თავში ახალი შესაძლებლობების აღმოჩენას, რადგან ეს ჩემთვის მნიშვნელოვანი ნაბიჯია განვითარებისა და საკუთარი პოტენციალის რეალიზებისკენ. ასევე ჩემთვის მნიშვნელოვანია ახალი გამოწვევების მიღება და იმ გარემოში ყოფნა, რომელიც მოტივაციას მაძლევს უკეთესი გავხდე.” - ლიზა აბაშიძე.


ეს წარმატება პროგრესის სამეწარმეო მიმართულების მნიშვნელოვანი შედეგია. პროგრესი არის სივრცე, სადაც იდეები რეალურ პროექტებად იქცევა და მოსწავლეები მნიშვნელოვანი ცვლილებების ავტორებად ყალიბდებიან.

ვუსურვებთ გუნდ "Bees"-ს ღირსეულ გამოსვლას საერთაშორისო ასპარეზზე და კიდევ ერთ დიდ გამარჯვებას!

პროგრესის გუნდი “Bees” საქართველოს Diamond Challenge-ის საერთაშორისო ფინალზე წარადგნეს.